Bibliya - Sugboanon | Numeros 33 - Sugboanon | Numeros 33 - Numeros 33

Numeros 33

Numeros 33:1 Kini mao ang mga pagpanaw sa mga anak sa Israel, sa diha nga nanggula sila gikan sa yuta sa Egipto pinaagi sa ilang mga panon ilalum sa kamot ni Moises ug ni Aaron.

Numeros 33:2 Ug si Moises nagsulat sa tanan nilang mga paglakaw sa paggula sumala sa ilang mga pagpanaw tungod sa sugo ni Jehova: ug kini mao ang ilang mga pagpanaw sumala sa ilang mga paglakaw sa pagpanggula.

Numeros 33:3 Ug sila mingpanaw gikan sa Rameses sa nahaunang bulan, sa ikanapulo ug lima ka adlaw sa nahaunang bulan; sa pagkaugma human sa pasko ang mga anak sa Israel nanagpanggula uban ang binayaw nga kamot sa atubangan sa mga mata sa mga Egiptohanon,

Numeros 33:4 Samtang ang mga Egiptohanon nanaglubong sa tanan nilang mga panganay, nga gipamatay ni Jehova sa taliwala nila: sa ibabaw sa ilang mga dios si Jehova nagahimo usab ug mga paghukom.

Numeros 33:5 Ug ang mga anak sa Israel mingpanaw gikan sa Rameses, ug mingpahaluna sa Succoth.

Numeros 33:6 Ug mingpanaw sila gikan sa Succoth, ug mingpahaluna sa Etham, nga didto sa daplin sa kamingawan.

Numeros 33:7 Ug mingpanaw sila gikan sa Etham, ug namalik ngadto sa Pi-hahiroth, nga diha sa atbang sa Baalsepon; ug ming pahaluna sila atbang sa Migdol.

Numeros 33:8 Ug sila mingpanaw gikan sa atbang sa Pi-hahiroth, ug minglabang sa taliwala sa dagat ngadto sa kamingawan: ug nanlakaw sila sa panaw nga tolo ka adlaw sa kamingawan sa Etham, ug mingpahaluna sa Mara.

Numeros 33:9 Ug sila mingpanaw gikan sa Mara, ug ming-abut didto sa Elim: ug didto sa Elim may napulo ug duha ka tinubdan sa tubig, ug kapitoan ka mga palma; ug sila mingpahaluna didto.

Numeros 33:10 Ug sila mingpanaw gikan sa Elim, ug mingpahaluna sa daplin sa Dagat nga Mapula.

Numeros 33:11 Ug sila mingpanaw gikan sa Dagat nga Mapula, ug mingpahaluna didto sa kamingawan sa Zin.

Numeros 33:12 Ug sila mingpanaw gikan sa kamingawan sa Zin, ug mingpahaluna didto sa Dopka.

Numeros 33:13 Ug sila mingpanaw gikan sa Dopka, ug mingpahaluna didto sa Alus.

Numeros 33:14 Ug sila mingpanaw gikan sa Alus, ug mingpahaluna didto sa Repidim, diin walay tubig nga mainum sa katawohan.

Numeros 33:15 Ug sila mingpanaw gikan sa Repidim, ug mingpahaluna didto sa kamingawan sa Sinai.

Numeros 33:16 Ug sila mingpanaw gikan sa kamingawan sa Sinai, ug mingpahaluna didto sa Kibroth-hataava

Numeros 33:17 Ug sila mingpanaw gikan sa Kibroth-hataava, ug mingpahaluna sa Haseroth.

Numeros 33:18 Ug sila mingpanaw gikan sa Haseroth, ug mingpahaluna sa Ritma.

Numeros 33:19 Ug sila mingpanaw gikan sa Ritma, ug mingpahaluna sa Rimmon-peres.

Numeros 33:20 Ug sila mingpanaw gikan sa Rimmon-peres, ug mingpahaluna sa Libna.

Numeros 33:21 Ug sila mingpanaw gikan sa Libna, ug mingpahaluna sa Rissa.

Numeros 33:22 Ug sila mingpanaw gikan sa Rissa, ug mingpahaluna sa Ceelatha.

Numeros 33:23 Ug sila mingpanaw gikan sa Ceelatha, ug mingpahaluna didto sa bukid sa Sepher.

Numeros 33:24 Ug sila mingpanaw gikan sa bukid sa Sepher, ug mingpahaluna sa Harada.

Numeros 33:25 Ug sila mingpanaw gikan sa Harada, ug mingpahaluna sa Maceloth.

Numeros 33:26 Ug sila mingpanaw gikan sa Maceloth, ug mingpahaluna sa Tahath.

Numeros 33:27 Ug sila mingpanaw gikan sa Tahath, ug mingpahaluna sa Tera.

Numeros 33:28 Ug sila mingpanaw gikan sa Tera, ug mingpahaluna sa Mithca.

Numeros 33:29 Ug sila mingpanaw gikan sa Mithca, ug mingpahaluna sa Hasmona.

Numeros 33:30 Ug sila mingpanaw gikan sa Hasmona, ug mingpahaluna sa Moseroth.

Numeros 33:31 Ug sila mingpanaw gikan sa Moseroth, ug mingpahaluna sa Bene-jaakan.

Numeros 33:32 Ug sila mingpanaw gikan sa Bene-jaakan, ug mingpahaluna sa Horhaguidgad.

Numeros 33:33 Ug sila mingpanaw gikan sa Horhaguidgad, ug mingpahaluna sa Jotbatha.

Numeros 33:34 Ug sila mingpanaw gikan sa Jotbatha, ug mingpahaluna sa Abrona.

Numeros 33:35 Ug sila mingpanaw gikan sa Abrona, ug mingpahaluna sa Esion-geber.

Numeros 33:36 Ug sila mingpanaw gikan sa Esion-geber, ug mingpahaluna didto sa kamingawan sa Zin (nga mao ang Cades).

Numeros 33:37 Ug sila mingpanaw gikan sa Cades, ug mingpahaluna sa bukid sa Hor, didto sa daplin sa mga kayutaan sa Edom.

Numeros 33:38 Ug si Aaron ang sacerdote mitungas ngadto sa bukid sa Hor tungod sa sugo ni Jehova, ug siya namatay didto, sa ika kap-atan ka tuig sa human ang mga anak sa Israel makagula gikan sa yuta sa Egipto, sa ikalima ka bulan, sa nahaunang adlaw sa bulan.

Numeros 33:39 Ug si Aaron may usa ka gatus ug kaluhaan ug tolo ka tuig ang panuigon sa iyang pagkamatay didto sa bukid sa Hor.

Numeros 33:40 Ug ang Canaanhon, ang hari sa Arad, nga nagapuyo sa Habagatar sa yuta sa Canaan, nakadungog mahitungod sa pag-abut sa mga anak sa Israel.

Numeros 33:41 Ug sila mingpanaw gikan sa bukid sa Hor, ug mingpahaluna sa Salmona.

Numeros 33:42 Ug sila mingpanaw gikan sa Salmona, ug mingpahaluna sa Punon.

Numeros 33:43 Ug sila mingpanaw gikan sa Punon, ug mingpahaluna sa Oboth.

Numeros 33:44 Ug sila mingpanaw gikan sa Oboth, ug mingpahaluna sa Ihe-abarim, didto sa utlanan sa Moab.

Numeros 33:45 Ug sila mingpanaw gikan sa Ihe-abarim, ug mingpahaluna sa Dibongad.

Numeros 33:46 Ug sila mingpanaw gikan sa Dibon-gad, ug mingpahaluna sa Almon-diblataim.

Numeros 33:47 Ug sila mingpanaw gikan sa Almon-diblataim, ug mingpahaluna didto sa kabukiran sa Abarim, atbang sa Nebo.

Numeros 33:48 Ug sila mingpanaw gikan sa kabukiran sa Abarim, ug mingpahaluna didto sa kapatagan sa Moab haduol sa Jordan didto sa Jerico.

Numeros 33:49 Ug sila mingpahaluna haduol sa Jordan, sukad sa Bethjesimot bisan hangtud ngadto sa Abel-sitim didto sa kapatagan sa Moab.

Numeros 33:50 Ug si Jehova misulti kang Moises didto sa kapatagan sa Moab haduol sa Jordan sa Jerico, nga nagaingon:

Numeros 33:51 Isulti mo ngadto sa mga anak sa Israel, ug ipamulong kanila: Sa diha nga kamo manabok sa Jordan ngadto sa yuta sa Canaan,

Numeros 33:52 Unya kamo magpapahawa sa tanang mga pumoluyo sa yuta gikan sa atubangan ninyo, ug magadugmok sa tanan nilang mga larawan nga bato, ug sa tanan nilang mga tinunaw nga larawan, ug magagun-ob sa tanan nilang hatag-as nga mga dapit:

Numeros 33:53 Ug kamo magapanag-iya sa yuta, ug magapuyo diha; kay nganha kaninyo gihatag ko na ang yuta aron magapanag-iya kamo niana.

Numeros 33:54 Ug kamo magapanunod sa yuta pinaagi sa pagpapalad sumala sa inyong mga panimalay; sa may daghan igahatag mo ang labing daku nga panulondon, ug sa may diyutay ikaw magahatag sa labing diyutay nga panulondon: bisan asa mahulog ang kapalaran sa bisan kinsa nga tawo, kadto mamao ang iya; sumala sa mga kabanayan sa inyong mga amahan kamo magapanunod.

Numeros 33:55 Apan kong kamo dili magapapahawa sa mga pumoluyo sa yuta gikan sa inyong atubangan, nan kadtong inyong gitugotan nga magapabilin gikan kanila mamahimong ingon sa mga puling sa inyong mga mata, ug ingon sa mga tunok diha sa inyong mga kilid, ug sila magasamok kaninyo sa yuta diin kamo magapuyo.

Numeros 33:56 Ug mahitabo, nga, ingon sa akong ginahunahuna nga pagabuhaton ngadto kanila, mao ang akong pagabuhaton nganha kaninyo.